ଭୁବନେଶ୍ୱର: ରାଜଧାନୀରୁ ଅପହୃତ ଶିଶୁପୁତ୍ର ଉଦ୍ଧାର। ଦୀର୍ଘ ୩୬ ଘଣ୍ଟା ପରେ ବାଲେଶ୍ଵରରୁ ଉଦ୍ଧାର କଲା କମିଶନରେଟ୍ ପୋଲିସ। ପିଲା ଚୋରକୁ ଗିରଫ କରାଯାଇଛି। ଶିଶୁପୁତ୍ରକୁ ଏବେ ଭୁବନେଶ୍ଵର ଅଣାଯାଉଛି। ଅଙ୍ଗ ତସ୍କରୀ ପାଇଁ ଶିଶୁ ଚୋରି ହୋଇଥିବା ଜଣାପଡ଼ିଛି। ଛୁଆକୁ ରଖିଥିବା ଅଭିଯୋଗରେ ଖନ୍ତାପଡ଼ା ଥାନା ବୋଇତା ଗାଁର ଜେଲମ୍ ରାଣୀ ପଣ୍ଡା ନାମକ ଜଣେ ମହିଳା ଅଟକ ଅଛନ୍ତି। ଉକ୍ତ ମହିଳାଙ୍କ ନିଜ ଛୁଆ କିଡନୀ ରୋଗରେ ଆକ୍ରାନ୍ତ ହୋଇଛି। ତେଣୁ କିଡନୀ ପାଇଁ ଅପହରଣକାରୀକୁ ସୁପାରୀ ଦେଇଥିଲେ ମହିଳା।
ସୂଚନାନୁଯାୟୀ, ସ୍ଵାମୀ ପରିତ୍ୟକ୍ତା ଦୃଷ୍ଟିବାଧିତ ଜୟନ୍ତୀ ମଲ୍ଲିକ ନୀଳାଦ୍ରିବିହାର କନ୍ୟାଶ୍ରମରେ ରହୁଥିଲେ । ତାଙ୍କର ଗୋଟିଏ ୭ ବର୍ଷର ଝିଅ ଓ ଦେଢ ବର୍ଷର ପୁଅ ଅଛନ୍ତି । ସେ ଦୀର୍ଘ ୫ ବର୍ଷ ଧରି ରାମ ମନ୍ଦିର ସମ୍ମୁଖ ଫୁଟ୍ପାଥରେ ଭିକ୍ଷାବୃତ୍ତି କରି ଆସୁଛନ୍ତି । ରାତି ହେଲେ ଘରକୁ ପଳାନ୍ତି । ଶନିବାର ଅପରାହ୍ଣରେ ବର୍ଷା ହେବାରୁ ସେ ଆଉ ଘରକୁ ଫେରିପାରି ନଥିଲେ । ଦୁଇ ଛୁଆଙ୍କୁ ଧରି ରାମ ମନ୍ଦିର ସମ୍ମୁଖ ଫୁଟ୍ପାଥରେ ଶୋଇ ପଡ଼ିଥିଲେ । ରାତି ୧୨ଟାରୁ ୨ଟା ମଧ୍ୟରେ ଜଣେ ବ୍ୟକ୍ତି ଆସି ସେଠାରେ ପହଞ୍ଚି ଜୟନ୍ତୀଙ୍କ ପୁଅ ସହିତ ଖେଳାଖେଳି କରିଥିଲେ । ଏହି ସମୟ ମଧ୍ୟରେ ଜୟନ୍ତୀଙ୍କ ଆଖି ଲାଗି ଯାଇଥିଲା । ରାତି ପ୍ରାୟ ୩ଟାରେ ସେ ଦେଖିବାବେଳକୁ ତାଙ୍କ ପୁଅ କୋଳରେ ନାହିଁ । ଶେଷରେ ଅନ୍ୟ ଉପାୟ ହୋଇ ଖାରବେଳନଗର ଥାନାରେ ଅଭିଯୋଗ କରିଥିଲେ। ଏହାପରେ ଟେକ୍ନିକାଲ ଇଣ୍ଟେଲିଜେନ୍ସ ଟିମ୍ ଶିଶୁପୁତ୍ରକୁ ଖୋଜିବା ଆରମ୍ଭ କରିଥିଲା। ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ନେଇ ସେମାନେ ତଦନ୍ତ ଚଳାଇଥିଲେ। ସେପଟେ ଅପହର୍ତ୍ତା ଶିଶୁପୁତ୍ରକୁ ନେଇ ରାଜ୍ୟ ବାହାରକୁ ପଳାଇଥିବା ସନ୍ଦେହରେ ଏକ ଟିମ୍ ରାଜ୍ୟ ବାହାରକୁ ଯାଇଥିଲା। ଏହି ଅପହରଣ ପଛରେ ଜୟନ୍ତୀଙ୍କ ସ୍ୱାମୀଙ୍କର ହାତ ଥାଇପାରେ ବୋଲି ସନ୍ଦେହ କରାଯାଉଛି । ତେଣୁ ସେ ଦିଗରେ ମଧ୍ୟ ପୁଲିସ ତଦନ୍ତ କରୁଛି । ତାଙ୍କ ସ୍ୱାମୀଙ୍କୁ ପୁଲିସ ଖୋଜାଖୋଜି କରୁଥିଲେ ମଧ୍ୟ ପତ୍ତା ମିଳୁନି । କିଏ ଓ କାହିଁକି ଜଣେ ସ୍ୱାମୀ ପରିତ୍ୟକ୍ତା ଦୃଷ୍ଟିବାଧିତ ଭିକ୍ଷୁକ ମା’କୋଳରୁ ଦେଢ଼ବର୍ଷର ଶିଶୁପୁତ୍ରକୁ ଅପହରଣ କରିନେଲା ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
