ନୂଆଦିଲ୍ଲୀ: ଫିନଲ୍ୟାଣ୍ଡ୍ ବିଶ୍ୱର ସବୁଠୁ ସୁଖୀ ଦେଶ । ଜାତିସଂଘର ଅନ୍ତର୍ଜାତୀୟ ସୁଖୀ ଦିବସରେ ପ୍ରକାଶିତ ବିଶ୍ୱ ସୁଖୀ ତାଲିକାରୁ ଏହା ଜଣାଯାଇଛି। ଏହି ରାଙ୍କିଙ୍ଗରେ ଭାରତ ୧୧୮ତମ ସ୍ଥାନରେ ରହିଛି । ବିଶ୍ବର ୧୪୭ ରାଷ୍ଟ୍ରର ଲୋକଙ୍କ ସୁଖ ଓ ସ୍ବାଛନ୍ଦକୁ ନେଇ ‘ୱାର୍ଲଡ ହାପିନେସ୍ ରିପୋର୍ଟ-୨୦୨୫’ ଆଜି ପ୍ରକାଶ ପାଇଛି । ଏହି ରିପୋର୍ଟରେ ଭାରତର ସ୍ଥାନ ବହୁତ ତଳେ ରହିଛି । ଏପରିକି ପାକିସ୍ତାନ ଏବଂ ନେପାଳ ଭଳି ଅତି କ୍ଷୁଦ୍ର ରାଷ୍ଟ୍ର ତୁଳନାରେ ମଧ୍ୟ ଭାରତର ସ୍ଥାନ ବହୁ ପଛରେ ରହିଛି । ତାଲିକାରେ ଫିନଲାଣ୍ଡ ଶୀର୍ଷ ସ୍ଥାନ ବଜାୟ ରଖିଥିବା ବେଳେ ଆଫଗାନିସ୍ତାନ ସବୁଠାରୁ ଶେଷରେ ରହିଛି ।
ଅକ୍ସଫୋର୍ଡ ୟୁନିଭର୍ସିଟିର ୱେଲବିଙ୍ଗ୍ ରିସର୍ଚ୍ଚ ସେଣ୍ଟର ଏବଂ ଜାତିସଂଘର ଏକ ସହଯୋଗୀ ସଂସ୍ଥା ଗଲଅପ୍ର ମିଳିତ ସହଯୋଗରେ ଗୋଟିଏ ରାଷ୍ଟ୍ରର ଲୋକଙ୍କ ଆଚରଣ ଓ ବ୍ୟବହାରକୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରାଯାଉଛି । ୧୪୭ଟି ରାଷ୍ଟ୍ରଙ୍କୁ ନେଇ ପ୍ରସ୍ତୁତ ହେଉଥିବା ଏହି ତାଲିକାରେ ଭାରତର ସ୍ଥାନ ୧୧୮ ରହିଛି । ବିଶ୍ବର ସବୁଠୁ ସୁଖୀ ରାଷ୍ଟ୍ର ଭାବେ ଫିନଲାଣ୍ଡ ପୂର୍ବ ଭଳି ଏହି ତାଲିକାରେ ପ୍ରଥମ ସ୍ଥାନରେ ରହିବା ସହିତ ଏହାପଛକୁ ଡେନମାର୍କ ଦ୍ବିତୀୟ ଏବଂ ଆଇସଲାଣ୍ଡ ତୃତୀୟ ସ୍ଥାନରେ ରହିଛନ୍ତି । କେଉଁ ରାଷ୍ଟ୍ରର ଲୋକମାନେ କେତେ ଖୁସି ତାହା ସାମାଜିକ ସହାୟତା, ମୁଣ୍ଡ ପିଛା ଆୟ, ସ୍ବାସ୍ଥ୍ୟ ଏବଂ ଜୀବନ ଧାରଣ ବୟସ, ସ୍ବାଧୀନତା, ଉଦାରତା ଏବଂ ଦୁର୍ନୀତି ଭଳି ମୁଖ୍ୟତଃ ୬ଟି ଦିଗ ବିଚାରକୁ ନେଇ ନିର୍ଦ୍ଧାରଣ କରାଯାଇଥାଏ ।
୨୦୧୨ରୁ ଆରମ୍ଭ ହୋଇଥିଲା ଏଭଳି ତାଲିକା ପ୍ରସ୍ତୁତି । ପ୍ରତ୍ୟେକ ଦେଶରୁ ଏକ ହଜାର ଲୋକଙ୍କ ମତାମତ ନେଇ ଏହି ତାଲିକା ପ୍ରସ୍ତୁତ କରାଯାଏ । ୨୦୧୨ ରିପୋର୍ଟରେ ଭାରତର ସ୍ଥାନ ୧୧୪ରେ ରହିଥିଲା ବେଳେ ୨୦୨୨ରେ ସ୍ଥିତିରେ ଉନ୍ନତି ଘଟି ଭାରତର ସ୍ଥାନ ୯୪ରେ ପହଂଚିଥିଲା । କିନ୍ତୁ ଚଳିତ ବର୍ଷ ରିପୋର୍ଟରେ ଭାରତର ସ୍ଥିତିରେ ଅବନତି ଘଟି ୧୧୮ରେ ପହଞ୍ଚିଛି । ଅବଶ୍ୟ ଗତବର୍ଷ ଭାରତର ସ୍ଥାନ ୧୨୪ରେ ଥିଲା ବେଳେ ଏଥର ସାମାନ୍ୟ ସୁଧାର ଆସିଛି । କିନ୍ତୁ ଭାରତର ପଡ଼ୋଶୀ ରାଷ୍ଟ୍ର ପାକିସ୍ତାନର ସ୍ଥାନ ଏହି ତାଲିକାରେ ୧୦୯ ରହିଥିଲା ବେଳେ ଶ୍ରୀଲଙ୍କା ୧୩୩, ବାଂଲାଦେଶ ୧୩୪, ନେପାଳ ୯୨ ଏବଂ ଚୀନ୍ର ସ୍ଥାନ ୬୮ ରହିଛି। ଅର୍ଥାତ୍ ପାକିସ୍ତାନ ଏବଂ ନେପାଳ ଲୋକଙ୍କ ଖୁସି ଠାରୁ ଭାରତୀୟମାନଙ୍କ ଖୁସି କମ୍ ରହିଛି।
